Datganiad Gwrthsemitiaeth Plaid Cymru
Mae gwrthsemitiaeth yn ganfyddiad penodol o Iddewon, a ellir ei fynegi fel casineb tuag at Iddewon. Cyfeirir fynegiannau rhethregol a chorfforol o wrthsemitiaeth tuag at unigolion Iddewig neu an-Iddewig a/neu eu heiddo, at sefydliadau cymunedol Iddewig a chyfleusterau crefyddol.
Mae'r canllawiau'n tynnu sylw at fynegiannau o wrthsemitiaeth, gan gynnwys enghreifftiau cyfoes o wrthsemitiaeth mewn bywyd cyhoeddus, y cyfryngau, ysgolion, y gweithle, a'r maes crefyddol, a allai, o ystyried y cyd-destun cyffredinol, gynnwys y canlynol (ond heb ei gyfyngu i hyn yn unig):
- Galw am, cynorthwyo, neu gyfiawnhau lladd neu niweidio Iddewon yn enw ideoleg radical neu farn eithafol ar grefydd.
- Gwneud honiadau celwyddog, dad-ddynol, cythreulaidd neu ystrydebol am Iddewon fel grŵp, neu am bŵer torfol Iddewon – megis, yn enwedig ond nid yn unig, y myth am gynllwyn Iddewig byd-eang, neu'r syniad bod Iddewon yn rheoli'r cyfryngau, yr economi, y llywodraeth neu sefydliadau cymdeithasol eraill.
- Cyhuddo Iddewon, fel pobl, o fod yn gyfrifol am gamweddau, gwirioneddol neu ddychmygol, a gyflawnwyd gan un unigolyn Iddewig neu grŵp Iddewig, neu hyd yn oed am weithredoedd a gyflawnwyd gan bobl nad ydynt yn Iddewon.
- Gwadu ffaith, cwmpas, dull (e.e. siambrau nwy) neu fwriadoldeb hil-laddiad y bobl Iddewig gan yr Almaen Sosialaidd Genedlaethol a'i chefnogwyr a'i chyd-droseddwyr yn ystod yr Ail Ryfel Byd (yr Holocost).
- Cyhuddo'r Iddewon fel pobl, neu Israel fel gwladwriaeth, o ffug-greu neu or-ddweud yr Holocost.
- Cyhuddo dinasyddion Iddewig o fod yn fwy ffyddlon i Israel, neu i flaenoriaethau honedig Iddewon ledled y byd, nag i fuddiannau eu cenhedloedd eu hunain.
- Gwadu hawl y bobl Iddewig i hunanbenderfyniad, ee drwy honni bod bodolaeth Gwladwriaeth Israel yn ymdrech hiliol.
- Gweithredu safonau dwbl gan ddisgwyl neu fynnu ymddygiad ganddi na ddisgwylir na fynnir gan unrhyw genedl ddemocrataidd arall.
- Defnyddio symbolau a delweddau sy'n gysylltiedig â gwrthsemitiaeth glasurol (ee honiadau bod Iddewon wedi lladd Iesu, neu'r enllib gwaed) i ddisgrifio Israel neu Israeliaid.
- Cymharu polisïau cyfoes Israel â pholisïau’r Natsïaid.
- Dal Iddewon yn dorfol gyfrifol am weithredoedd gwladwriaeth Israel.
Mae Plaid Cymru yn credu bod pawb yn gyfartal, beth bynnag yw eu hil neu eu crefydd. Golyga hyn bod yn rhaid condemnio pob math o drosedd casineb yn gyfartal.
Nid ydyw’n wrthsemitaidd i feirniadu Llywodraeth Israel, os nad oes yna dystiolaeth ychwanegol yn awgrymu bwriad gwrthsemitaidd.
Nid ydyw’n wrthsemitaidd i ddal Llywodraeth Israel at yr un safonau â democratiaethau rhyddfrydol eraill, na chwaith dangos diddordeb arbennig ym mholisïau neu weithredoedd Llywodraeth Israel, os nad oes yna dystiolaeth ychwanegol yn awgrymu bwriad gwrthsemitaidd.
Gan hyn y mae Plaid Cymru yn mabwysiadu'r diffiniad uchod o wrthsemitiaeth ac yn ymrwymo i frwydro yn erbyn y math hwn o hiliaeth niweidiol.