Gweithredwch yn ôl y ‘data nid dyddiadau’ meddai Arweinydd Plaid Cymru Adam Price wrthi i Lywodraeth Cymru baratoi map allan o’r clo
Dylai ymlacio cyfyngiadau gael eu gyrru gan “ddata nid dyddiadau” yn ôl Arweinydd Plaid Cymru, Adam Price.
Mae disgwyl i’r Prif Weinidog Mark Drakeford gyhoeddi ‘map’ allan o gyfyngiadau heddiw.
Dywedodd Mr Price er bod y darlun yn gwella “wythnos fesul wythnos” ac wrth ganmol bawb a fu’n rhan o’r ymdrech i ostwng y cyfraddau trosglwyddo, nid oedd Cymru “yno eto” o ran bod yn barod i lacio cyfyngiadau ar lefel genedlaethol.
Galwodd Arweinydd Plaid Cymru am estyniad i’r cynllun ffyrlo am “sawl mis ar ôl i gyfyngiadau ddod i ben” gan ofyn am leddfu cyfyngiadau teithio yn “ofalus”.
Ychwanegodd Mr Price ei fod yn gobeithio y byddai'r Llywodraeth yn rhoi ffocws craff ar ailgyflwyno swigod mewn ymateb i'r unigrwydd cynyddol o ganlyniad i'r cyfyngiadau cyfredol.
Ychwanegodd na ddylid anwybyddu’r argyfwng iechyd meddwl ac ychwanegodd ei bod yn “hanfodol” y byddai popeth yn cael ei wneud i alluogi campfeydd i fod ymhlith y cyfleusterau cyntaf i ailagor.
Ychwanegodd Sian Gwenllian AS, Gweinidog Cysgodol Plaid Cymru, fod yn rhaid i ddiogelwch staff ysgolion a phlant fod yn “brif flaenoriaeth” wrth i ysgolion baratoi i agor i fwy o blant yr wythnos nesaf.
Galwodd Ms Gwenllian ar y Llywodraeth i fod yn “gwbl dryloyw” gyda’r cyngor gwyddonol diweddaraf cyn dychwelyd unrhyw garfannau pellach a dywedodd y dylai fod yn barod i gau ysgolion unigol yn “gyflym” pe bai clystyrau’n dechrau ymddangos.
Ychwanegodd y Gweinidog Addysg Cysgodol y dylai'r Llywodraeth Lafur gefnogi’n llawn galwadau i staff ysgolion gael blaenoriaeth ar gyfer y brechlyn o fewn eu grwpiau oedran.
Dywedodd Arweinydd Plaid Cymru, Adam Price AS:
“Mae'n ymddangos bod y darlun yn gwella wythnos fesul wythnos a dylid canmol pawb sy'n rhan â'r ymdrech i ostwng y cyfraddau trosglwyddo.
“Fodd bynnag, nid ydym yno eto o ran bod yn barod i lacio cyfyngiadau ar lefel genedlaethol.
“Mae cyfraddau heintiau yn parhau i fod yn uchel ac mae'r hyblygrwydd sydd gennym yn parhau i fod yn gyfyng. Ar bob cam, dylai unrhyw lacio gael ei yrru gan ddata nid dyddiadau.
“Ni allwn anwybyddu’r argyfwng iechyd meddwl sydd yn bodoli yn sgil y pandemig. Mae'n hanfodol bod popeth posibl yn cael ei wneud i alluogi campfeydd i fod ymhlith y cyfleusterau cyntaf i ailagor.
“Mae unigrwydd hefyd yn her go iawn i lawer o bobl, a gobeithiwn y bydd y llywodraeth yn rhoi ffocws craff ar pryd a sut y bydd yn ddiogel dychwelyd i swigod estynedig.
“Dylid lleddfu cyfyngiadau teithio yn ofalus a’r dull synhwyrol fyddai ailgyflwyno’r neges “aros yn lleol” cyhyd ag y bo angen.
“Mae'n hanfodol bod y rhai sydd wedi colli eu bywoliaeth yn parhau i gael eu cefnogi ac rydym yn cefnogi galwad y Resolution Foundation yr wythnos hon i ymestyn ffyrlo am sawl mis ar ôl i'r cyfyngiadau cloi ddod i ben.”
Ychwanegodd Gweinidog Cysgodol Plaid Cymru dros Addysg Sian Gwenllian AS,
“Rhaid i ddiogelwch staff a phlant yr ysgol fod yn brif flaenoriaeth wrth i ysgolion baratoi i ail-agor i fwy o blant yr wythnos nesaf.
“Mae cael ein plant yn ôl i addysg wyneb yn wyneb yn hynod o bwysig ond dylai hyn gael ei yrru gan ddata nid dyddiadau hefyd.
“Rydyn ni’n disgwyl i’r Llywodraeth fod yn gwbl dryloyw gyda’r cyngor gwyddonol diweddaraf y mae’n ei gael cyn dychwelyd unrhyw garfannau pellach - ac yn barod i gau ysgolion unigol yn gyflym pe bai clystyrau’n dechrau ymddangos.
“Dylai’r Llywodraeth Lafur gefnogi galwadau’n llawn i staff ysgolion gael blaenoriaeth ar gyfer y brechlyn o fewn eu grwpiau oedran. Dylai mesurau diogelwch bwysleisio awyru adeiladau ysgolion yn ddigonol yn ogystal.
“Yn y cyfamser, mae’r rhaniad digidol yn dal i fodoli ar gyfer y rhai sydd eto i ddychwelyd, a rhaid i’r Llywodraeth ddyblu ei hymdrechion i sicrhau bod pob plentyn a pherson ifanc yn cymryd rhan lawn yn eu gwaith ysgol.