Vaughan Gething yn ymddiswyddo fel Prif Weinidog

Mae Plaid Cymru yn galw am etholiad Senedd snap

Wrth ymateb i ymddiswyddiad Vaughan Gething fel Prif Weinidog ac Arweinydd Llafur Cymru, dywedodd Arweinydd Plaid Cymru Rhun ap Iorwerth:

“Mae pobol Cymru wedi colli ffydd yn y Prif Weinidog, yn hwyr iawn mae wedi gwneud y peth iawn ac wedi ymddiswyddo.

“Ond mae pobl Cymru yn colli hyder yng ngallu Llafur i lywodraethu Cymru.

“Gallai hwn fod y trydydd Prif Weinidog Llafur mewn saith mis – cylch cythreulig o anhrefn.

“Mae Llafur wedi rhoi buddiannau’r blaid o flaen buddiannau’r genedl ers gormod o amser.

“Rhaid rhoi’r cyfle i bobl Cymru ethol llywodraeth newydd a rhaid galw etholiad.

“Mae Plaid Cymru yn barod i wasanaethu gyda llwyfan sy’n rhoi tegwch ac uchelgais wrth ei galon.

“Mae pleidleiswyr ar hyd a lled Cymru yn haeddu llywodraeth ddi-ildio wrth fynd i’r afael â’r materion sydd bwysicaf iddyn nhw – o restrau aros y GIG uchaf erioed a ffrewyll tlodi plant, i ganlyniadau addysgol is na’r cyfartaledd ac adeiladu economi sy’n gweithio i bawb.

“Ar ôl 25 mlynedd wrth y llyw, nid yw Llafur yn gallu ailadeiladu ac adnewyddu o’r tu mewn."