Gaza: Plaid Cymru yn galw ar Lywodraeth y DU i osod sancsiynau ar Israel

'Mae gan y DU gyfrifoldeb moesol a chyfreithiol i sicrhau bod Israel yn cydymffurfio â chyfraith ryngwladol.' - Ben Lake AS

Heddiw (dydd Mawrth 26 Awst) mae Plaid Cymru wedi galw ar Lywodraeth y DU i osod nifer o sancsiynau ar Israel er mwyn rhoi pwysau arnynt i gydymffurfio â chyfraith ryngwladol.

Mae Plaid Cymru eisoes wedi galw am gydnabyddiaeth ddiamod o Balesteina ar unwaith yn ogystal â rhoi diwedd ar werthiant arfau i Israel.

Fodd bynnag, dywedodd Llefarydd Materion Tramor y blaid, Ben Lake AS, fod angen i Lywodraeth y DU weithredu o ddifrif gan osod sancsiynau economaidd ar Israel.

 

Mae Plaid Cymru yn galw ar Lywodraeth y DU i:

  • Roi diwedd ar gytundeb masnach presennol y DU gydag Israel

 

  • Ddod â chynllun 2030 am bartneriaeth agosach rhwng y DU ac Israel i ben

 

  • Osod sancsiynau ar bob unigolyn gaiff ei amau o dorri cyfraith ryngwladol

 

  • Wahardd mewnforio nwyddau o aneddiadau anghyfreithlon Israel ym Mhalesteina

 

Dywedodd Mr Lake fod rhaid atal cytundebau masnach sy'n rhoi triniaeth ffafriol i Israel yn ogystal ag atal y cynllun 2030 am bartneriaeth agosach rhwng y DU ac Israel - galwad sy'n cael ei chefnogi gan arbenigwyr cyfreithiol.

Er bod Ysgrifennydd Tramor y DU eisoes wedi cyhoeddi y byddai sancsiynau'n cael eu gosod ar ddau weinidog o Israel ynghyd â rhai ymsefydlwyr o Israel, mae Plaid Cymru yn pwyso ar Lywodraeth y DU i rewi asedau a gwaharddiadau teithio ar uwch aelodau o Lywodraeth a byddin Israel, sy'n gyfrifol am annog hil-laddiad yn Gaza ac am gynnal a gwthio'r gwladychu o Balesteina gan Israel yn ei flaen.

Ddydd Sul (24 Awst) lladdodd ymosodiad dwbl gan Israel ar ysbyty yn Gaza 20 o bobl, gan gynnwys newyddiadurwyr a gweithwyr iechyd.

Ddydd Gwener, galwodd Ysgrifennydd Cyffredinol y Cenhedloedd Unedig y newyn a gadarnhawyd yn Ninas Gaza a'r ardaloedd cyfagos yn "fethiant gan ddynoliaeth."

Disgrifiodd Antonio Guterres yr argyfwng fel "trychineb a grewyd gan ddyn" ar ôl i gorff a gefnogir gan y Cenhedloedd Unedig godi'r sefyllfa mewn rhai rhannau o'r tiriogaeth i Gam 5 - y lefel uchaf o ansicrwydd bwyd.

 

Dywedodd llefarydd Materion Tramor Plaid Cymru, Ben Lake AS:
"Mae'r argyfwng dyngarol yn Gaza yn erchyll ac un y gallai fod wedi'i atal yn llwyr. Mae newyn wedi'i ddatgan gan arbenigwyr y Cenhedloedd Unedig, ond mae Israel yn methu â chaniatáu digon o fwyd a chyflenwadau meddygol i gyrraedd Gaza, gan berygli cannoedd o filoedd o fywydau.
"Rhaid i Lywodraeth y DU gymryd camau sylweddol i rwystro gwneud bwyd yn arf, a dylai sancsiynau gael eu gosod ar lywodraeth Israel. Dylid atal cytundebau masnach sy'n rhoi triniaeth ffafriol i Israel, a ni ddylai Llywodraeth y DU wastraffu unrhyw amser wrth atal cynllun 2030 i greu cysylltiadau agosach rhwng y DU ac Israel, gwahardd nwyddau o aneddiadau anghyfreithlon, a dod â gwerthiant arfau i ben yn llwyr.
"Rydym hefyd yn galw am sancsiynau wedi'u targedu ar unigolion sy'n annog trais tuag at sifiliaid ac sy'n torri cyfraith ryngwladol. Mae gan y DU gyfrifoldeb moesol a chyfreithiol i sicrhau bod Israel yn cydymffurfio â chyfraith ryngwladol, ac mae angen gweithredu ar frys i atal trychineb dyngarol pellach yn Gaza."