Rhun ap Iorwerth
Llun: Senedd Cymru
Anrhydedd fy mywyd yw cael fy ethol yn Brif Weinidog Cymru, ac rwy'n cymryd y cyfrifoldeb hwnnw gyda phob gwyleidd-dra. Rwy'n ddiolchgar iawn i bobl Cymru am ymddiried ym Mhlaid Cymru, a fy mlaenoriaeth nawr yw cyflawni'r newid cadarnhaol y pleidleisiodd pobl drosto.
Mae hyn yn nodi pennod newydd i Gymru. Wrth i mi baratoi i benodi Cabinet yfory, rwy'n glir y bydd fy llywodraeth yn Llywodraeth i Bawb. Waeth sut y gwnaethoch chi bleidleisio, byddaf yn gweithio i sicrhau bod pobl yn gweld manteision llywodraeth sy'n canolbwyntio ar ganlyniadau ac sydd wedi ei gwreiddio mewn cymunedau ledled Cymru.
Bydd fy llywodraeth yn gweithredu yn wahanol o'r diwrnod cyntaf: penderfyniadau cyflymach, atebolrwydd cliriach a chanolbwyntio ar ganlyniadau, nid cyhoeddiadau. Yr hyn sy'n bwysig yw bod pobl yn teimlo gwelliannau yn eu bywydau.
Mae'r heriau sy'n wynebu Cymru yn rhy ddifrifol ar gyfer gwleidyddiaeth fel yr arfer. Mae gormod o blant mewn tlodi, teuluoedd yn cael trafferth gyda chostau byw, a hyder wedi ei golli. Rydym yn benderfynol o newid hynny.
- Byddwn yn cyflwyno cynnig gofal plant uchelgeisiol i helpu teuluoedd gyda chostau byw.
- Byddwn yn gweithio'n ddi-baid i dorri rhestrau aros y gwasanaeth iechyd a sicrhau dyfodol hirdymor y gwasanaeth iechyd fel bod pobl yn cael gofal cyflymach.
- Bydd addysg yn ganolog, gyda chanolbwynt newydd ar safonau fel bod gan bob person ifanc y cyfle i lwyddo.
- Byddwn yn datgloi potensial economaidd Cymru drwy gefnogi busnesau, creu swyddi da a sicrhau twf ledled y wlad.
- Byddwn yn gweithio'n adeiladol gyda San Steffan lle mae'n fuddiol i Gymru, gan sefyll dros fuddiannau Cymru yn ddi-ffael.
Pleidleisiodd pobl dros newid, ac maen nhw'n disgwyl gweld hynny. Bydd y 100 diwrnod cyntaf yn gosod y naws gydag arweinyddiaeth newydd, egni newydd, a phwyslais bendant ar wella bywydau pobl ledled Cymru.
Dros Gymru.
Rhun ap Iorwerth
Prif Weinidog Cymru