Mae pob un o saith prif fwrdd iechyd Cymru yn destun rhyw fath o ymyrraeth wedi’i thargedu ar hyn o bryd. Mae rhai, fel Bwrdd Iechyd Prifysgol Betsi Cadwaladr, wedi bod mewn mesurau arbennig ers blynyddoedd.
Mae angen i ni dorri’r cylch diddiwedd o reoli argyfyngau yn ein GIG – cylch sy’n adlewyrchu system sy’n rhy gymhleth, diffyg meddwl mewn ffordd gydgysylltiedig, gormod o flaenoriaethau sy’n gwrthdaro, a llinellau atebolrwydd aneglur.
Er mwyn sicrhau bod trefniadau llywodraethu GIG Cymru yn addas i’r diben, byddwn yn:
- Symleiddio’r prosesau cynllunio ac adrodd ar gyfer gofal iechyd – gyda blaenoriaethau cliriach a llai o dargedau, a’u bod yn fwy penodol a realistig.
- Ailddiffinio cyfrifoldebau Llywodraeth Cymru ac ailwampio Gweithrediaeth y GIG – gyda’r cyntaf o’r rhain yn gyfrifol am bennu’r cyfeiriad polisi cyffredinol, a’r ail yn goruchwylio’r materion gweithredol o ddydd i ddydd.
- Datblygu safonau proffesiynol ar gyfer rheolwyr y GIG ac ymgynghori ar gyflwyno corff rheoleiddio, i sicrhau bod gan arweinwyr yr arbenigedd a’r sgiliau arbenigol sydd eu hangen ar y GIG.
- Gwella sut mae data am berfformiad y GIG yn cael ei gasglu a’i rannu.
- Ei gwneud yn gliriach pryd a pham y dylid rhoi byrddau iechyd mewn mesurau arbennig neu eu tynnu ohonynt, a thynnu’r wleidyddiaeth o’r broses hon drwy ei rhoi yn nwylo Gweithrediaeth y GIG.
- Sefydlu diwylliant newydd, sy’n canolbwyntio mwy ar berfformiad ar draws GIG Cymru, sy’n croesawu cwynion a chael ei herio, a lle mae llais y cleifion wir yn cael ei werthfawrogi.
- Sicrhau bod enghreifftiau o arferion da yn cael eu nodi, eu rhannu a’u rhoi ar waith ledled Cymru.
Gyda’i gilydd, bydd y diwygiadau hyn yn golygu bod modd gwneud penderfyniadau yn gyflymach ac yn fwy effeithiol, yn erbyn set fwy rhesymegol o nodau a thargedau, a gydag amlinelliad cliriach o bwy sy’n gyfrifol am beth. Bydd hyn yn gosod sylfaen newydd i ddarparu’r gwasanaethau gofal iechyd mwy cadarn a chynaliadwy y mae pobl yng Nghymru eu hangen ac yn eu haeddu.
Gan fynnu mwy gan y strwythurau llywodraethiant presennol, byddwn yn parhau i adolygu a yw’r strwythurau hyn yn addas i’r diben, ac yn cyflwyno cynlluniau i’w newid lle bo angen.
Yn benodol, byddwn yn datblygu cynllun pwrpasol i ddelio â’r gamreolaeth barhaus ym Mwrdd Iechyd Prifysgol Betsi Cadwaladr, gan archwilio’r holl opsiynau ar gyfer diwygio i ddarparu gwell gwasanaethau iechyd a gofal yn y Gogledd fel mater o frys.