Feto seneddol yn “hanfodol” cyn unrhyw weithredu milwrol gan y DU yn y Dwyrain Canol - Plaid Cymru

Mae Arweinydd Plaid Cymru, Rhun ap Iorwerth AS, ac Arweinydd y blaid yn San Steffan, Liz Saville Roberts AS, wedi rhybuddio Llywodraeth y DU heddiw rhag cael eu llusgo i wrthdaro “a allai fod yn drychinebus” yn y Dwyrain Canol, a bod yn rhaid i Senedd y DU gael dweud ei dweud ar unrhyw gynigion o weithredu milwrol.

Croesawodd Rhun ap Iorwerth AS a Liz Saville Roberts AS alwadau’r Prif Weinidog Keir Starmer am ddiplomyddiaeth a dad-ddwysáu, ond mynegodd y ddau bryderon nad oedd wedi llwyddo i gondemnio'r ffaith fod yr Arlywydd Trump wedi awdurdodu ymosodiadau gan yr Unol Daleithiau yn erbyn Iran dros nos.

Ychwanegodd gwleidyddion Plaid Cymru mai dilyn trywydd o heddwch ddylai gael blaenoriaeth dros unrhyw deyrngarwch gan y DU i’r Unol Daleithiau a rhybuddion nhw yn erbyn ailadrodd hanes pan tynnwyd y DU i mewn i wrthdaro yn y Dwyrain Canol fel “pyped America”.

 

Mewn datganiad ar y cyd, dywedodd Rhun ap Iorwerth AS a Liz Saville Roberts AS:

“Mae posibilrwydd go iawn y bydd penderfyniad yr Arlywydd Trump i lansio ymosodiadau’r Unol Daleithiau yn erbyn Iran yn drychinebus i ranbarth sydd eisoes yn ansefydlog.

“Er bod galwadau’r Prif Weinidog Keir Starmer am ddiplomyddiaeth a dad-ddwysáu i’w croesawu, mae’n destun pryder nad yw wedi llwyddo i gondemnio gweithredoedd yr Arlywydd Trump yn llwyr.
“Dylai heddwch fod yn flaenoriaeth dros unrhyw deyrngarwch gan y DU i’r Unol Daleithiau. Rydym i gyd yn cofio’r canlyniadau trychinebus o gael ein llusgo i wrthdaro yn y Dwyrain Canol fel pyped America.
“Mae’n hanfodol felly bod gan y Senedd y cyfle i roi feto ar unrhyw weithredu milwrol gan y DU yn y gwrthdaro rhwng Israel ac Iran pe bai Keir Starmer yn ildio i unrhyw bwysau gan yr Arlywydd Trump ac yn cynnig rhyw fath o ymyrraeth.
“Yn yr un modd ag y mae plaid y Democratiaid yn yr Unol Daleithiau yn rhanedig ar y mater, mae’n bosibl y bydd Keir Starmer yn wynebu pwysau gan rai o aelodau Llafur i ddilyn esiampl yr Arlywydd Trump.
“Lansiwyd ymosodiadau awyr yn erbyn Syria yn 2018 heb i'r Senedd gael y cyfle i bleidleisio ar weithredu milwrol. Ar y pryd, cyhuddodd Plaid Cymru’r Prif Weinidog Theresa May o ddangos diffyg parch llwyr tuag at ddemocratiaeth.
“Rydym yn sefyll yn gadarn wrth y farn honno ac yn ailadrodd ein galwadau am ataliaeth er mwyn osgoi colli rhagor o fywydau sifil diniwed.”