Plaid Cymru yn beirniadu Llafur am ‘alluogi agenda Nigel Farage’ ar loches

‘Nid faint o bobl sy’n cael eu troi nôl yw mesur gwlad waraidd, ond sut mae’n trin y rhai mwyaf bregus’ – Liz Saville Roberts AS

Mae Plaid Cymru wedi beirniadu cynigion lloches Llafur, sy’n cynnwys gorfodi pobl sy’n cael lloches i aros hyd at 20 mlynedd cyn gwneud cais am arhosiad parhaol ac o bosibl gymryd gemwaith gwerthfawr ffoaduriaid i dalu costau llety.

Mae’r blaid yn dweud bod y mesurau hyn yn gyfystyr ag ildio i bwysau poblogaidd yn hytrach na llunio polisïau cyfrifol. Mae arweinydd y blaid yn San Steffan, Liz Saville Roberts AS, wedi rhybuddio bod polisïau o’r fath mewn perygl o gosbi teuluoedd agored i niwed, tanseilio integreiddio, ac erydu ymddiriedaeth yn y system.

Dywedodd arweinydd Plaid Cymru yn San Steffan, Liz Saville Roberts AS:

“Gyda’r cyhoeddiad hwn, mae Llafur yn plygu i’r dde boblyddol, gan alluogi agenda Nigel Farage drwy gyfnewid egwyddorion am benawdau diog. Bydd eu cynigion yn cosbi pobl sydd eisoes wedi dioddef caledi ofnadwy. Nid yw cymryd eiddo personol a gadael teuluoedd mewn limbo biwrocrataidd am hyd at 20 mlynedd yn angenrheidiol nac yn deg.

“Mae system loches y DU wedi cael ei chamreoli ers tro byd – mae’n gostus, yn anhrefnus, ac yn methu ffoaduriaid a’r cymunedau sy’n eu croesawu. Byddem yn cefnogi mesurau i wneud y system brosesu yn fwy effeithiol, ond dim ond codi ofn, rhwystro integreiddio, a thanseilio sefydlogrwydd economaidd y bydd rhethreg yr Ysgrifennydd Cartref yn ei wneud. Y gwir yw bod ffoaduriaid yn cyfrannu at ein cymunedau ac at ein heconomi, ond yn rhy aml maent yn cael eu bwrw fel dim ond baich.

“Mae rheolau clir yn angenrheidiol. Ond mae rheolau heb ddynoliaeth yn erydu ymddiriedaeth ac yn tanio rhaniad. Nid faint o bobl sy’n cael eu troi nôl yw mesur gwlad waraidd, ond sut mae’n trin y rhai mwyaf bregus. Bydd Plaid Cymru yn gwrthod creulondeb perfformiadol. Rydym yn sefyll dros degwch a thrugaredd. Mae hynny'n hanfodol os ydym am gadw cymunedau'n ddiogel, cynnal ymddiriedaeth mewn systemau, a chynnal ein gwerthoedd.”