‘Diddymu’r cap dau blentyn i fynd i’r afael â thlodi plant – dyma ry' ni wedi'i ddweud o’r cychwyn cyntaf’ - Plaid Cymru

‘Efallai bod Llafur yn dechrau sylweddoli na bleidleidiodd pobl drostynt y llynedd ar sail eu pardorwydd i geisio plesio rheiny ar y dde ac i fabwysiadu polisïau Torïaidd’ - Ann Davies AS

Mae tasglu tlodi plant Llywodraeth y DU wedi nodi mai codi'r cap dau blentyn yw'r ffordd fwyaf effeithiol o fynd i'r afael â thlodi plant.

Mae llefarydd gwaith a phensiynau Plaid Cymru, Ann Davies AS, wedi pwysleisio bod hyn yn rhywbeth y mae ei phlaid wedi bod yn galw amdano ers i'r polisi gael ei gyflwyno gan y Torïaid yn 2017.

Mae disgwyl i dlodi plant godi yng Nghymru o 32.3% ym mis Ionawr 2025 i 34.4% erbyn 2029.

Yn ddiweddar, adroddodd y Trussell Trust fod y risg o dlodi bwyd i deuluoedd â thri neu fwy o blant yn eithriadol o uchel gyda'r cap dau blentyn yn "cyfrannu'n sylweddol" at hynny. Fe wnaethon nhw hefyd adrodd y byddai diddymu'r polisi yn codi 28,900 o bobl yng Nghymru allan o galedi difrifol erbyn 2026/27.

Mae Plaid Cymru wedi galw ers tro byd am ddiddymu’r cap dau blentyn ac wedi cyflwyno cynigion a chefnogi gwelliannau yn San Steffan ac yn y Senedd.

Ym mis Gorffennaf 2024, cyflwynodd yr SNP welliant i Araith y Brenin yn galw am ddiddymu’r cap dau blentyn, a gefnogwyd gan Blaid Cymru ar y pryd. Fodd bynnag, pleidleisiodd pob AS Llafur o Gymru yn erbyn y gwelliant hwn, gan sicrhau bod y polisi’n parhau i gael ei weithredu.

 

Dywedodd llefarydd gwaith a phensiynau Plaid Cymru, Ann Davies AS:
"Mae teuluoedd ledled Cymru yn cael eu gwthio’n ddyfnach i dlodi gan bolisi sy’n cosbi plant am amgylchiadau sydd y tu hwnt i’w rheolaeth. Mae Plaid Cymru wedi galw’n gyson am ddiddymu’r cap dau blentyn, nid yn unig gan mai dyma'r peth moeol cywir i'w wneud ond gan bod ymchwil dros ar ôl tro wedi dangos mai dyma'r ffordd fwyaf effeithiol a chyflym o godi miloedd o blant allan o dlodi. Mae hyn yn rhywbeth rydyn ni'n gwybod ers amser maith.
“Mae Plaid Cymru wedi cyflwyno cynigion yn San Steffan ac yn y Senedd yn galw am ddiddymu’r polisi, rhywbeth y mae Llafur wedi pleidleisio’n gyson yn ei erbyn. Mae’n arwyddocaol bod tasglu Starmer ei hun bellach wedi cyfaddef yr hyn rydyn ni wedi bod yn ei ddweud ers sbel. Efallai bod Llafur yn dechrau sylweddoli na bleidleidiodd pobl drostynt y llynedd ar sail eu pardorwydd i geisio plesio rheiny ar y dde ac i fabwysiadu polisïau Torïaidd.
“Dywedais hyn nôl ym mis Gorffennaf 2024, ac fe'i ddywedaf eto: y ‘newid’ mwyaf pwerus y gallai Llywodraeth y DU hon ei weithredu fyddai cael gwared ar y cap dau blentyn. Rwy’n annog y Prif Weinidog i weithredu nawr i ostwng cyfraddau brawychus tlodi plant a sicrhau bod pawb yn cael y dechrau gorau posibl mewn bywyd.”